I sommar blir det arrangert ein pilegrimstur frå Stavanger til Røldal i juli og ein frå Egersund til Stavanger i august. Bli med på innhaldsrike vandringar, tidebøner og måltidsfellesskap!
Bildetekst: 
Vandringa over Jæren frå Egersund til Stavanger går i fantastisk natur. (Foto: Greta Bore Haarr)
Turane er i regi av Utstein Pilegrimsgard og Den norske kyrkja i Rogaland, og blir leia av erfarne pilegrimar. Turen til Røldal går til det årlege Pilegrimsstemnet der, mens turen til Stavanger blir avslutta med den store pilegrimsdagen 16. august i samband med 900-årsjubileet for kyrkja i Rogaland.
Les meir om den på: www.kirken.no/jubileum2025.
Frå Stavanger til Røldal 1. – 6. juli
Frå byen ved havet og øyane går turen inn fjordane, gjennom grøderike dalar og over høgfjellet til pilegrimsmålet. På reisa er følgjet innom seks kyrkjer før ein kjem fram til stavkyrkja i Røldal. Undervegs blir det korte samlingar – og tid til stillheit.
Sokneprest i Sauda Espen Gya og sjømannsprest Anne Netland vil vera med som pilegrimsprestar. Reidunn Ferstad frå Trodla-Tysdal er óg med som leiar.
Røldal var, etter Nidaros, det mest kjende pilegrimsmålet i Norge i middelalderen. I hundrevis av år søkte pilegrimar frå fjern og nær det undergjerande krusifikset.
Bli med på ein innhaldsrik tur med buss, båt og vandringar. Det blir gudstenester, tidebøner, meditasjonar, samtaler og gode måltidsfellesskap.
Gå Kystpilegrimsleia over Jæren 12. - 16. august
Vandringa startar frå Egersund kirke tysdag morgon og endar opp i Stavanger laurdag ettermiddag, til pilegrimsmesse i Domkirken.
Langs pilegrimsleia over Jæren ligg fleire middelalderkyrkjer, Ogna kyrkje, Orre gamle kyrkje og Sola ruinkirke, i tillegg til 400 år gamle Egersund kirke, Varhaug gamle kyrkjegard og pilegrimsmålet Stavanger domkirke.
Me ferdast langs kysten og går på sand og stiar, gras, grus og litt asfalt, og passerer blant anna Friluftsfyret Kvassheim, Obrestad fyr, Hå gamle prestegard og Friluftshuset på Orre. I løpet av dagen har me tidebønner. Om kvelden er det samling med blant anna oppsummering av dagen.
Vandringsleiarar er Ola Undheim og Greta Bore Haarr, pilegrimsprest er tidlegare sokneprest Andreas Haarr. Velkommen til vandring på denne fantastiske kyststrekninga!
Meir om turane og påmelding finn du på www.utsteinpilegrimsgard.no