Fire søkjarar til stilling som kyrkjeverje. - Tilsetjing vert avgjort av Fellesrådet måndag 7. april, seier Steinar Sørhus, leiar i fellesrådet.
Kyrkjeverje Inghart Lasse Tveit blir pensjonist denne sommaren.
Det kom inn 5 søknadar, men etter at den eine trekte sin søknad står desse kandidatane att:
- Bjarte Fitjar, 50 år, Nedstrand.
- Grethe Austevik Halvorsen, 59 år, Nedre Vats.
- Frank Steinsvik, 55 år, Notodden.
- Ingrid Tveit, 37 år, Skjold
Den som vert tilsett tek til i stillinga 4. august. Fram til ut juni set noverande kyrkjeverje, Inghart Lasse Tveit, i stillinga som dagleg leiar for fellesrådet i Vindafjord. Ei stillings som har tittelen: Kyrkjeverje. Han har bak seg 28 år i denne stillinga når han går av.
I nr 5 av Hyrdingen i 2023 skreiv Nils Olav Østrem fylgjande omtale av kyrkjeverja, i samband med at han fylte 65 år. Vi presenterer denne omtalen ein gong til her:
Kyrkjeverja
Av Nils Olav Østrem (oktober 2023) Lenke til nr 5-2023
Kyrkjeverje i Vindafjord, Inghart Lasse Tveit, fylte 65 år 25. september 2023.
Han er fødd i Sauda som son av smelteverksarbeidar Sigurd Tveit og samaritt/menighetssøster Klara Tangen. Dei sju første leveåra sine budde Inghart Lasse i Åbøbyen saman med foreldra sine og broren Hallgeir Lennart. Barndomsåra i Sauda betyr mykje for Inghart Lasse og han er blitt ein mann med nær kontakt til saudamiljøet. Det siste er tilfelle ikkje minst i form av korrespondansen hans med Kjartan Fløgstad, Sauda-forfattaren.
Inghart Lasse var både elev av og speidar hjå Kjell Kalstveit. Kjell betydde mykje for han både på Liarheim skule og i 1. Skjold KFUM speidargruppe. Etter det altfor tidlege dødsfallet til Kjell i 1978, 37 år gamal, tok Inghart eit hovudansvar for vidareføring av speidararbeidet i bygda.
Evjemoen i Setesdalen og Åsegarden ved Harstad blei tenestestadene for unge Tveit i det militære. Han gjennomførte med glød tenestetida si som infanterist i Brigaden i Nord-Norge. Bergen har også vore ein sentralt stad i livet til Inghart Lasse. Han studerte historie mellomfag og fleire andre universitetsfag.
Både frå denne tida i Neumanns gate nær Nygårdshøyden og gjennom livet elles har han opparbeidd seg mykje kunnskap, kritisk rettferdssans og visdom på mange felt. Det er ei lang rekkje område Inghart Lasse har engasjert seg på. Målarbeid, sogelag og bygdebokarbeid er noko av det han har brukt krefter på. Hans innsats og juridiske kunnskap var avgjerande for at Aleksander Nagel sitt gåvebrev blei sikra til gode for Skjold gjennom Nagel-fondet etter at staten selde Studiegarden i bygda.
No har Inghart Lasse om lag halve livet bak seg som kyrkjeverje i arbeid for kyrkjene og kyrkjelydane i Vindafjord. Stab og medarbeidarar, vener og kjenningar gler seg over at han kom seg vel gjennom eitt hjartetilfelle som nær hadde kosta han livet for om lag eitt år sidan. Underteikna (Nils Olav Østrem) takkar for venskap og fellesskap heilt frå same kristne speidarpatrulje og ungdomslag i 1970-åra.